Hausten 2026 er det 17 år sidan Opera Nordfjord hadde premiere på si aller første operaoppsetting i det nyopna Operahuset Nordfjord, med operaen Carmen av Georges Bizet. No er det igjen duka for ny Carmen-feber, med eit flott kunstnarisk team og eit spennande solistlag, med både «gamle kjenningar» og nye talent.

Det kunstnariske teamet vert leia av regissør Marit Grytnes Dullaert frå Kristiansund, og med seg har ho musikalsk leiar Per Kristian Skalstad, scenograf Åse Hegrenes, kostymedesignar Jenny Hilmo Teig, lysdesignar Ovar Holmen og regiassistent og koreograf Simen Gloppen.

Operaen er så heldig å ha fått tak i mezzosopran Lilly Jørstad som Carmen, Simen Bredesen som Don José, Cleo Lee-McGowan som Micaëla, Magnus Dorholt Kjeldal som Escamillo, Elisabeth Gimmestad som Frasquita, Cecilia Lund Tomter som Mercedes, Markus Bjørlykke som Remendado, Lars Eggen som Dancaire, Espen Langvik som Morales og Trond Gudevold som Zuniga.

I tillegg til songsolistane skal vi òg ha med tre dansarar frå Eid: Thea Mavropoulou, Sara Arnestad og Tuva Nyhammer-Taklo. Stort operakor, derav òg eit stort damekor er sjølvsagt, og igjen skal eit stort barnekor få glitre på scena, som for 17 år sidan.

Opera Nordfjord gler seg stort til igjen å gi liv og form til denne fantastiske operaen, som er ein av dei mest kjende og mest spelte operaene i verda. Med eit stort oppbod av framifrå solistar og dyktige, lokale songkrefter under leiing av eit kunstnarisk frå øvste hylle lovar det godt for nypremieren av Carmen i Operahuset Nordfjord 30. september og til saman 8 framsyningar, den siste 11. oktober.

Billettar

CARMEN

Medverkande